Глас 6. В понедельник утром. Тропари и стихиры на каждый день

Седа́льны умили́тельны. Гла́с 6:

Помышля́ю де́нь стра́шный, и пла́чуся дея́ний мои́х лука́вых, ка́ко отвеща́ю Безсме́ртному Царю́? ко́им же дерзнове́нием воззрю́ на Судию́ блу́дный а́з? Благоутро́бный О́тче, Сы́не Единоро́дный, и Ду́ше Святы́й, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Во удо́ли плаче́вней, на ме́сте иде́же положи́, егда́ ся́деши, Ми́лостиве, сотвори́ти пра́ведный су́д, не обличи́ моя́ сокрове́нная, ниже́ посрами́ мене́ пред А́нгелы: но пощади́ мя, Бо́же, и поми́луй мя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Пресла́вную Бо́жию Ма́терь, и святы́х А́нгел Святе́йшую, немо́лчно воспое́м се́рдцем и усты́, Богоро́дицу сию́ испове́дающе, я́ко вои́стинну ро́ждшую Бо́га воплоще́нна и моля́щуюся непреста́нно о душа́х на́ших.

Седа́льны. Гла́с 6.

Поми́луй на́с, Го́споди, поми́луй на́с: вся́каго во отве́та недоуме́юще, сию́ Ти моли́тву я́ко Влады́це гре́шнии прино́сим, поми́луй на́с.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Го́споди, поми́луй на́с, на Тя́ бо упова́хом, не прогне́вайся на ны́ зело́, ниже́ помяни́ беззако́ний на́ших: но при́зри и ны́не я́ко благоутро́бен, и изба́ви ны́ от вра́г на́ших. Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.

Сти́х: Ди́вен Бо́г во святы́х Свои́х, Бо́г Изра́илев.

Све́т пра́ведным при́сно, святи́и бо о Тебе́ просве́щшеся, сия́ют всегда́ я́ко свети́ла, све́щник неве́рных угаси́вше: и́хже моли́твами, Спа́се на́ш, Ты́ просвети́ свети́льник мо́й, Го́споди, и спаси́ мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: В хра́ме стоя́ще сла́вы Твоея́, на небеси́ стоя́ти мни́м. Богоро́дице, две́рь небе́сная, отве́рзи на́м две́ри ми́лости Твоея́.

Седа́льны. Гла́с 6.

Стра́шнаго дне́ прише́ствия Твоего́ ужаса́юся, Христе́, и неумоле́ннаго суди́ща бою́ся и трепе́щу, я́ко имы́й мно́жество согреше́ний: но пре́жде конца́ мя обрати́в спаси́ я́ко Ми́лостив Бо́г, А́нгел Твои́х моли́твами, благоутро́бне Спа́се, еди́не Человеколю́бче.

Душе́, в ле́ности жи́знь провожда́ющи всю́, дне́ су́днаго гро́знаго во уме́ не прие́млеши, воспряни́ у́бо, и покая́ние себе́ избери́, обрати́ся и возопи́й ко Христу́: Ще́дре, не воспомяни́ на́ших мно́гих согреше́ний, в ча́с осужде́ния.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Упова́ние, и покро́в, и приста́нище на Тя́ наде́ющымся, Богороди́тельнице блага́я, предста́тельнице ми́ру, моли́ со безпло́тными приле́жно, Его́же родила́ еси́ человеколю́бнаго Бо́га, изба́витися душа́м на́шым от вся́каго преще́ния, еди́на благослове́нная.

На стихо́вне стихи́ры покая́нны, гла́с 6:

На́га мя́ обре́т от доброде́телей вра́г, стрело́ю грехо́вною уязви́: но Ты́ я́ко вра́чь ду́ш же и теле́с, я́звы души́ моея́ исцели́, Бо́же, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Се́рдца моего́ стру́пы от мно́гих согреше́ний возра́стшыя ми́ исцели́, Спа́се, я́ко ду́ш и теле́с вра́чь, подая́ прося́щым согреше́ний проще́ние, при́сно подая́ ми сле́зы покая́ния: и да́руй ми́ разреше́ние долго́в, Го́споди, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Го́споди, в па́мяти святы́х Твои́х, вся́ тва́рь пра́зднует, небеса́ ра́дуются со а́нгелы, и земля́ весели́тся с челове́ки: те́х моли́твами поми́луй на́с.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Арха́нгельское сло́во прия́ла еси́ и херуви́мский престо́л показа́лася еси́, и на руку́ носи́ла еси́, Богоро́дице, наде́жду ду́ш на́ших.

Блаже́нна, гла́с 6:

Помяни́ мя, Бо́же Спа́се мо́й, егда́ прии́деши во Ца́рствии Твое́м: и спаси́ мя я́ко еди́н Человеколю́бец.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Пре́зри я́же в ве́дении и не в ве́дении соде́янная моя́, Иису́се Человеколю́бче, и спаса́емых ча́сти сподо́би мя́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Просвети́вый а́нгельския ли́ки, те́х мольба́ми, Христе́, зра́к се́рдца моего́ просвети́.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Вся́ко искуше́ние ра́н подъе́мше, страстоно́сцы, ра́ны и стру́пы челове́ком ве́рующым при́сно исцеля́ете.

Сла́ва Отцу́ и Сы́ну и Свято́му Ду́ху:

Тро́ице Святе́й поклони́мся, пое́мей а́нгельскими во́инствы, то́й вопию́ще: спаси́ ду́шы на́шя.

И ны́не и при́сно и во ве́ки веко́в. Ами́нь:

Богоро́дичен: Изба́ви мя́ огня́ ве́чнаго, и му́к належа́щих ми́, Богороди́тельнице, я́ко да ублажа́ю Тя́.